“Mənim Məqsədim”

"Mənim məqsədim"

Layihənin həyata keçirilmə səbəbi və məqsədi:

      Ailə başçısını itirmiş ailələrin maddi baxımdan yaşadığı çətinliklərin ən önəmlisi uşaqlara təhsil verilməsidir. Yaxından tanış olduğumuz və müşahidə etdiyimiz əmanət abituriyentlər arasında kifayət qədər potensiallı gənclər var. “Cığır” MDİD İB olaraq artıq bir neçə ildir ki “Təhsil təqaüdü” layihəmizi həyata keçirərək bu potensialın böyüməsinə və inkişafına dəstək olmağa çalışırıq. (Ətraflı məlumat üçün: “Təhsil təqaüdü”)

       İlk dəfə 2021-ci ildə abituriyent əmanətlərimiz arasından bacarıqlı gənclərimizi seçmək və onları daha yaxından tanımaq üçün “Mənim məqsədim” layihəsini həyata keçirdik. Layihə eyni zamanda abituriyentləri ictimai birliklə daha yaxından tanış etmək, onlarda sağlam həyat məqsədi formalaşdırmaq, sosial məsuliyyət və fərqindəlik hissi formalaşdırmaq, xəyal dünyalarını zənginləşdirmək kimi bir sıra məqsədlərə xidmət edir.

“Gələcək məqsədi olanların ovuclarındadır.”

Layihənin gedişatı:

      Təhsil almağı hədəfləyən əmanət abituriyentlərimizi plan və proqramı tələbə, pedaqoq və psixoloq heyəti tərəfindən hazırlanan 3 günlük təlimə dəvət edirik. 3 gün müddətində abituriyentlərimiz birliyimizin əsas layihələri ilə yaxından tanış olurlar və layihənin məqsədinə uyğun təlim, təqdimat, vörkşop və terapiyalar həyata keçirilir.

  • “Mülk” xeyriyyə alış-veriş mərkəzinə ekskursiya: Layihə müddətində şagirdlərlə “Mülk” mağazasının filiallarına ekskursiya təşkil olundu. Orada əməkdaşların rəhbərliyi ilə mağazanın dünənindən bu gününə qədər olan həyat yoluna nəzər yetirildi.
  • Könüllülərin təqdimatları: Hər bir könüllünün “Cığır” İB-də olan könüllülük fəaliyyətini əks etdirən hesabat xarakterli layihələr şagirdlərdə yeni hədəflər doğurdu.
  • Mütaliə saatı: ADU- nun müəllimi, pedaqoq Günel Ələkbərova tərəfindən keçirilən, gənclərin həyatında elmin rolu, kitab oxumağın, mütaliənin onlara qatqısından bəhs edən oxu saatı iştirakçılara hüzur dolu anlar yaşatdı.
  • Film saatı: Könüllü gənclər və müəllimlərlə birlikdə şagirdlər təfəkkür dünyalarını zənginləşdirəcək, dünyagörüşlərini artıracaq filmlər seyr edib, birgə müzakirələr edib, bir-birilə fikirlərini bölüşüb və əylənərək öyrəniblər.
  • Psixoloji art terapiyası: Lomonosov adına Moskva Dövlət Universitetinin məzunları, könüllü psixoloqlar Leyla Məmiyeva və Səidə Naxmedova tərəfindən təbiət qoynunda- dəniz kənarında, parklarda art terapiyalar keçirildi. Şagirdlər rənglər vasitəsilə öz daxili aləmlərini vərəqlər üzərində əks etdirdilər.
  • Xeyriyyə küçə satışı: “Mülk” alış- veriş mərkəzində hazırlanan xüsusi səbətlərlə qrup halında Bakının müxtəlif səmtlərinə yollanan şagirdlər insanların qəlbinə xeyir toxumu səpdilər.
  • “Amber soap” layihəsi ilə tanışlıq: “Cığır” İB-nin yeni layihələrindən olan “Amber soap” layihəsi şagirdlərdə xüsusi maraq doğurdu. Estetik zövqü özündə əks etdirən müxtəlif formalı sabunlar əmanətlər tərəfindən həvəslə hazırlandı.
  • Dizayn və psixoloq komandasının birgə təşkilatçılığı ilə “Mənim məqsədim” workshopu: Könüllü tələbə Elbəy Əliyev və psixoloq Leyla Məmiyevanın iştirakı ilə keçirilən workshopun məğzi “Həyat məqsədim” adlı sosial sorğudan ibarət idi.

Layihənin sonunda uşaqlara hədiyyələr verilir və təhsil təqaüdü ilə təmin olunmaq üçün potensiallarına uyğun maliyyə ayrılır.

Sosial mediada bizi izləyə bilərsiniz.