10 iyun 2025-ci il tarixində İsmayıllı rayonunun Uşaq və Ailələrə Dəstək Mərkəzində Birliyimizin “Qiraət mədəniyyətinin formalaşdırılması” layihəsinin bölgə üzrə açılış tədbiri keçirildi.
Tədbirdə mərkəzin direktoru, İsmayıllı rayon İcra Hakimiyyətindən nümayəndə, nəşriyyat və kitabxana evlərindən nümayəndələr, müəllimlər və Birliyimizin qeydiyyatında olan ailələrimiz iştirak etdilər.
Açılış tədbiri “Cığır” MDİD İctimai Birliyi tərəfindən həyata keçirilən sosial və mədəni layihələri əks etdirən videoçarxların nümayişi ilə başladı. Ardınca isə Birliyimizin təsisçisi, filologiya üzrə fəlsəfə elmləri doktru Yeganə Mirzəyeva çıxış edərək, oxu mədəniyyətinin insan ruhunun formalaşmasında, mənəvi inkişafda və gənclərin şəxsiyyət kimi yetişməsində əvəzsiz rolundan bəhs etdi. Tədbirin digər hissəsində “Kitab ətri” layihəsinin 10 illik fəaliyyətini əks etdirən video təqdimat, “Salam Yurdu” Təlim-Tədris Mərkəzinin şagirdlərinin iştirakı ilə “Balaca Şahzadə” əsərindən səhnəcik və layihənin rəhbəri Günel Babayevanın üç ay müddətində həyata keçiriləcək layihə haqqında məlumatlandırma çıxışı yer aldı. Günün sonunda uşaqlara kitablar hədiyyə olundu və qısa kitab mütaliəsi edildi, oyun oynanıldı. Eyni zamanda Yeganə Mirzəyeva analarla kitab oxumağın həyatımızdakı rolu və mütaliənin mahiyyəti haqqında danışdı. Layihənin həyata keçirilməsində göstərdiyi dəstəyə görə QHT-lərə Dövlət Dəstəyi Agentliyinə, məkan dəstəyi üçün İsmayıllı rayon Uşaq və Ailələrə Dəstək Mərkəzinin rəhbərliyinə, tədbirdə iştirak edən bütün qonaqlarımıza və layihəyə könüldən qatılan hər bir kəsə təşəkkür edirik.
