11 iyun 2025-ci il tarixində Ağdaş rayonunun Heydər Əliyev Mərkəzində Birliyimizin “Qiraət mədəniyyətinin formalaşdırılması” layihəsinin bölgə üzrə açılış tədbiri keçirildi. Tədbirdə “Parlaq imza” nəşriyyatının nümayəndəsi,gənc yazar- Amin Oruc və “Cığır” MDİD İctimai Birliyinin qeydiyyatında olan ailələrimiz iştirak etdilər. Açılış tədbiri “Cığır” MDİD İctimai Birliyi tərəfindən həyata keçirilən sosial və mədəni layihələri əks etdirən videoçarxların nümayişi ilə başladı. Ardınca isə Birliyimizin təsisçisi, filologiya üzrə fəlsəfə elmləri doktoru Yeganə Mirzəyeva çıxış edərək, oxu mədəniyyətinin insan ruhunun formalaşmasında, mənəvi inkişafda və gənclərin şəxsiyyət kimi yetişməsində əvəzsiz rolundan bəhs etdi. Tədbirin digər hissəsində “Kitab ətri” layihəsinin 10 illik fəaliyyətini əks etdirən video təqdimat, “Salam Yurdu” Təlim-Tədris Mərkəzinin şagirdlərinin iştirakı ilə “Balaca Şahzadə” əsərindən səhnəcik və layihənin rəhbəri Günel Babayevanın üç ay müddətində həyata keçiriləcək layihə haqqında məlumatlandırma çıxışı yer aldı. Günün sonunda uşaqlara kitablar hədiyyə olundu və qısa kitab mütaliəsi edildi, oyun oynanıldı. Eyni zamanda Yeganə Mirzəyeva analarla kitab oxumağın həyatımızdakı rolu və mütaliənin mahiyyəti haqqında danışdı. Layihənin həyata keçirilməsində göstərdiyi dəstəyə görə QHT-lərə Dövlət Dəstəyi Agentliyinə, məkan dəstəyi üçün Ağdaş rayonu Heydər Əliyev Mərkəzinin rəhbərliyinə, tədbirdə iştirak edən bütün qonaqlarımıza və layihəyə könüldən qatılan hər bir kəsə təşəkkür edirik.
